احب ان اضيف هذه المساجلة بين الشيخ محمد بن راشد المهنا النعيمي (ابو بدر) والامير محمد الاحمد السديري(ابو زيد) رحمة الله عليهم جميع:
البدع لابوبدر محمد بن راشد:
لاحت سهوم النور بالفجر و انجال ............ جنح الظلام وفاختنى نجومه
وقـلبي يتلـه من عـراويــه تلال............. وأنا بقلبي داري ويش قومه
جاله من الهاجوس ماخبث البال ............. والقلب يالاجواد عرق وثومه
قلب عطوف يم الأجـواد ميـال.............. ومن كان مثلي فالعرب ماتلومه
لجواد عز الجار و زمول الأحمال............ مثل السهل فيه الدمث و النعومه
لجواد وافين العهد قول وأعمال..............طبـايـع ماهيب درس اعـلومـه
رجـالهـم عند الـملازيـم رجال...............من هين الموقف ترده سلومه
ورجالهم لو هو فغير من المال ............. يفدي بدمه دون ذمه ولومه
هات القلم واكتب تحيات وامثال ...........ومعاني بأقصى الضمير محكومه
ماهاوت الهين ولا هافي الخال ............ولاهيب للي يوهمنه حلومه
وحاشا ولايوم لها جات لسوال.............عليا ومن طاري الزهيد محشومه
تاقت لشغموم ورا بعد الاميال .............والبعد مايثنى الفتى في لزومه
قم يانديبي دن مايطوي اللال ...............الى اشهب من دون الحبايب ردومه
مكينته نوع من الجوهر العال................صلب الحديد اللي نضاف جرومه
ليكن حفيف بلوفها حث شلال .............. لاهيب ماتسمع ولاب مكتومه
لونه زهي زلن على سيته اشكال............ روعه ومن غالي الحرير مخدومه
اسمر حمر كانه تحت في وظلال ........... وبالشمس لونا يوهمنك سهومه
هباع قطاع الريادي و الاسهال ............. كدلك وتوه من امريكه قدومه
من جوبة الدمام يابدر لا مال .................الفي و الصحراء تلاشى سمومه
سربه بتوفيق الولي عالم الحال .............العالي اللي مانعلم ملعومه
يم الرياض العاصمه مهد الأبطال..............جيل على علياه تشهد خصومه
لا حل خلف قطيهن هوش وكتال ............ وشوق الفتية وهقنه و هومه
اخوان نوره عند تاليهن ثقال ................. لاخوع الجيد وخارت عزومه
ومن الرياض اسرح عسى الرشد لك فال.....سند وقيعان(( الخفية)) يمومه
ومنصاك بيت للمراكيب مدهال .............. بيت الثنا و المجد من فجر يومه
بيت الحسب بيت النسب بيت من طال.......صيته ورا نجد وجتنا علومه
بيت السديري بيت كساب الأنفال............زبن اللهيف وريف بده وقومه
المحتسي للمرجله كار ورجال ............... لاجات من يم الشحيح مهزومه
محمد ذرب النبا ذرب الأفعال ................. رمز الزمان اللي تنحوا قرومه
عصر مضى زلت سنينه ولا زال ................العصر فات وباقيات رسومه
سلم عليه اعداد ماهل هطال ............... وبل من المنشى ترادف غيومه
غط الوطى ديمه ومن وابله سال.............. سيل يغبي مانبى من حزومه
وقل له لفناى منه طارش ومرسال.............وهدية باعلى الوقار مختومه
هدية عندي لها كار واجلال .................. هدية في ذا السنين معدومه
سيرة وفا ما سايرت عصر الأنذال ............وان جات سذاج العقةل مهضومه
وهاذي بعصر فات يالقرم ومحال ............. يرجع لنا الفايت وننسى همومه
وافي وشيمه يوم لجواد عقال ...............يوم النسب مافيه عيب يشومه
يوم النسب للي يعجون للتال................. لا جا نهار فيه للموت حومه
والا لمن ينزل على بيته انزال ................ بيت من الميره وساع وضومه
ماهيب سلعة واحد عند دلال.................هذا يبرق بع وهذا يسومه
والحق للي يفرق السوم بريال ..............سلعة حراج ما وراها غنومه
وكان الرد من ابو زيد محمد السديري كالتالي :
يقول: من شرف على روس الاقذال .........راس الطويل اللي نبا من رجومه
رجم بـراسه لـلمـشاكيـل مدهـال..........ميقاع سمح الريض من عقب حومه
فـكرت بالـدنيـا بلقـفاء و الاقـبـال ............. تضحك وتبكي بالغات رسومه
وقامت همومي بالصناديق تجتال ............وزفرات بانت بالضماير رقومه
حـولت منه خـاطري للـوفا مـال ............. يم العزيز اللي فوادي يرومه
لأبو بدر ساس الوفا مرخص المال............اللي من المعروف فصل هدومه
وافي ويلبسله من الطيب سربال ......... درع عريض ضافيات اكمومه
خطه لفا في صفحة الطرس سيال ........قاف بصفحه باغة ومختومه
فـتـحـتـلته بالقلب باب له أقفال ............وفكري صحا لأبو بدر عقب نومه
أهلا عدد ما كان نازل و رحال ...............من سوق نجران الى سوق دومه
واعداد مايسكب من الغيث همال ......... وبل على وبل تسابع اهشومه
عقبه زهور الورد بالعشب تختال ............فيه ام سالم كل رجم تهومه
تلعب طرب بالحانها تشده البال.............. ماهيب من خضر الرياض محرومه
ماسايلت من قول شامت وعذال .............وما همها نواب وفد الحكومه
راعي الوفا له داخل القلب منزال.............لو دونه ديار وساع خرومه
يابـو بـدر تبـدلـت كل الاحوال .................وحتى اشقر الجنحان بدل ابومه
وجيمع شيمات العرب صارت اطلال.......... مثل الهدام اللى وساع ثلومه
دنيا يشيب هولها روس الاطفال ............ولا عرفنا بدرها من نجومه
منها الجديد امبدلينه بالاسمال ................ وجهال وأرزالن ترفع اخشومه
أقفت سنين الخير عنا بالأعجال............. وشفنا اسنين السو شومه ولومه
دنـيا ضـحايـا قـدرهـا كل ريبال ..................نطاح قـا لاتن يجي بالزهـومه
يابو بدر شفنا غرابيل و اهوال .................واوباش وانذالن ترفع اخشومه
دنيا بغفلتها ركض كل ختال .................... وكم خيرن بالغدر توكل لحومه
الخبث له بايع وشاري ونقال .................... والطيب ارخض مالقى من يسومه
وديك الدجاج معلق فيه خلخال ...................وحطو مفاتيح الذهب في ابهومه
الإهداءات
العرض العادي
المواضيع المتشابهه
